廚詩 212: 《炸羊肉雞蛋》

大蛋 8隻／羊肉 600克／薑 約3吋長／蒜頭 12粒／Garam Masala（印度混合香料） 1茶匙／黃薑粉 1茶匙／紅辣椒粉 1茶匙／海鹽 2茶匙／麵包糠（幼細） 150克／植物油 2公升／茄汁 適量

將大蛋完全焯熟，放凍水一會後脫殼備用 >> 羊肉放碎肉機打碎，置大碗中 >> 薑、蒜頭去皮，切成粗粒，放碎肉機打成蓉，與羊肉拌勻 >> 再拌入所有香料和鹽調味 >> 將肉料分成8份 >> 每份完整包裹一隻蛋，肉料厚度盡量平均 >> 包好後放麵包糠內輕輕滾動，讓肉料表面沾滿薄薄的糠 >> 油置中式鑊/平底深鍋內燒熱至180°C >> 分批放入羊肉蛋，炸約2-3分鐘至焦黃 >> 放廚紙吸油並放涼一點 >> 沾茄汁同吃，感受不一樣的復活蛋味道。

是非愛 201: 《老友》

你老哥真係「忽忽地」，鍾意飄忽；忽然又去咗黃泉。喂，Pat Old “老伯”，而家點算先？第日我去柏林，邊個照我呀？

我知，呢個地球好X悶，你老哥成世人不停逃避，搬屋搬廠搬寫字樓。難得又比你搵到愛沙尼亞同柏林兩塊樂土，日日聲色犬馬，疏乎到—死。

老伯，你罪孽深重，睇怕都係落地獄㗎啦。咁咪仲好？天堂就如人間的牛津，太「乾淨」啦，唔啱你。地獄夠Wild，夠Exotic；你老哥唔憂無刺激，無創作靈感啦，希望你早日响地獄開Show。

記唔記得我地最後一次Email呀？你話Miss同我Hea的時光；而家開口中啦，無下次。不過，你都係將我忘記咗好D，千奇唔好又報夢又顯靈，嚇X死我！你知你老哥副尊容㗎啦，尤其係正面「啤」住人嘅時候。令人心都寒埋。所以我都係揀你張側面嚟記住吓你。

喂，死鬼佬，安息啦，飲少D酒，搞少D女人，傷身㗎！今時唔同往日，無永生㗎！

廚詩 211: 《龍蝦仔意大利飯》

4人份量

龍蝦仔肉 250克／橄欖油 1.5湯匙／意大利米 200克／龍蝦湯 850毫升／水 850毫升／海鹽 1茶匙／現磨黑胡椒／淡牛油 30克／白蘭地酒 4茶匙／大黃 (Rhubarb) 1條／植物油 200毫升

龍蝦仔去頭去殼去腸，備用 >> 平底深鍋煲熱湯及水，轉小火保溫 >> 另一平底鍋燒熱，下油，炒米至外圍呈半透明狀態 >> 加入2勺湯，並不斷攪勻 >> 至大部份湯汁被米所吸收，再加1勺湯，攪拌 >> 不斷重覆步驟，直至米飯變熟但仍有「咬口」為止，約20分鐘 >> 放鹽及胡椒調味，熄火 >> 蝦肉放鍋底，用飯及汁覆蓋，放牛油，加鍋蓋焗熟，約3分鐘 >> 大黃刨幼條，放油鍋炸香備用，約1分鐘 >> 將飯、蝦肉、牛油拌勻盛起 >> 飯面灑上酒及大黃，趁熱進食。

廚詩 210: 《夏威夷鮮果沙律芝士杯》

6人份量

菠蘿 1/4個／澳洲芒果 1/2個／泰國木瓜仔 1個／皇帝蕉 4條／牛油果 1/2個／合桃肉 40克／薄荷葉／巴馬芝士 200克／醬汁：椰醬 3湯匙／冧酒 1.5湯匙

所有生果去皮去核/芯，切大粒，放雪櫃內 >> 焗爐預熱至120°C >> 芝士刨成碎，焗盤上放焗爐紙 >> 將芝士碎平鋪成一個薄的圓形層，約8吋直徑 >> 視乎焗盤大小，可多鋪1-2個 >> 入爐焗約4分鐘，至芝士融化並滾燙 >> 出爐，趁熱用批刀小心將芝士抬起，平放於覆轉的高身玻璃杯底上，熱軟的芝士會自然垂下 >> 重覆步驟，共做6個芝士杯 >> 待芝士杯放涼及變硬後，取出生果 >> 椰醬混和酒放生果內拌勻 >> 搗碎合桃肉及切碎薄荷葉，放沙律內拌勻 >> 將沙律平均放入芝士杯內即成。

廚詩 209: 《愛爾蘭黑啤牛柳批》

4人份量

橄欖油 4湯匙／牛柳 300克／大洋葱 1個／甘荀（約8吋長） 1條／薯仔 1個／蒜頭 2粒／青豆 150克／黑啤 600毫升／月桂葉 3-4片／百里香 2束／海鹽及現磨黑胡椒 適量／蜜糖 1.5湯匙／餅皮 (Short Crust Pastry) 4片／蛋 1隻／肉豆蔻粉 (Nutmeg) 1茶匙

牛柳、洋葱、甘荀、薯仔切成小粒 >> 平底鍋燒熱後放橄欖油 >> 先以大火煎香牛柳粒，再放其他材料炒至軟身 >> 蒜頭切碎，青豆解凍後一起下鍋 >> 炒至有蒜頭香味後，下啤酒 >> 大滾後下月桂葉及百里香 >> 弄濕一張焗爐紙，將汁料完全覆蓋，蓋上鍋蓋 >> 收細火，滾約25分鐘，至材料軟爛及汁水濃稠 >> 將葉及香草取走，加鹽及胡椒調味 >> 熄火，將材料倒起 >> 加蜜糖拌勻 >> 餅皮放室溫解凍，雞蛋於碗中打勻 >> 放圓碟於餅皮上，沿碟邊𠝹出一個圓形 >> 材料放涼後分4份，將1份放圓形餅皮上半部，材料要離皮邊3/4吋 >> 掃蛋液於全個皮的邊緣，將下半部覆蓋上半部，成半圓形 >> 用手指輕壓兩層皮邊，並向內覆摺封口 >> 剩下的餅皮用來𠝹出美麗的圖形或字形，輕貼於批面做裝飾 >> 蛋液平均掃於全個批面，灑一些肉豆蔻粉，並在批頂刺數個小孔作透氣用 >> 重覆步驟做餘下3個批 >> 焗爐加熱至200°C，焗盤上放焗爐紙再放批 >> 焗約20分鐘至皮面焦香即可。